Ինչու՞ պետք է հանդիպեն Նիկոլ Փաշինյանն ու Սերժ Սարգսյանը և ի՞նչ պետք է քննարկեն

Armeniasputnik.am-ը գրում է․ Ռուս դիվանագետ, ԵԱՀԿ ՄԽ նախկին համանախագահ Վլադիմիր Կազիմիրովն առաջարկել է Հայաստանի ներկայիս ու նախկին առաջնորդներին հանդիպել ու միասին քննարկել Արցախի շուրջ ստեղծված իրավիճակը։ Իր առաջարկը նա հրապարակել է «Նեզավիսիմայա գազետա» թերթի էջերին։

Կազիմիրովի խոսքով` Հայաստանի ներքին իրավիճակը կրկին լարվում է, որովհետև երկրի անվանի առաջնորդների միջև բախումներ են առաջացել։ Նա համոզված է` լարվածությունը չի նպաստի Արցախի հարցի բանակցություններում Հայաստանի դիրքի ամրապնդմանը։ Ու պատահական չէ, որ ադրբեջանական կողմն արդեն փորձում է մեղադրել Երևանին հանդիպումներն ու բանակցությունները ձգձգելու մեջ։ Ոչ միայն ներքին գործընթացները, այլև բանակցային գործընթացը պահանջում են, որ երկրի բոլոր առանցքային ուժերը միասնական գործեն։

«Անհարմար եմ զգում դրսից խորհուրդներ տալ, հատկապես, թվում է`միամիտ բան եմ ասում, բայց արդյո՞ք Լևոն Տեր-Պետրոսյանի, Ռոբերտ Քոչարյանի, Սերժ Սարգսյանի ու Նիկոլ Փաշինյանի հանդիպման ժամանակը չի եկել` թեկուզ միայն ղարաբաղյան հիմնախնդրի կարգավորման ուղիները քննարկելու։ Համոզված եմ` նրանցից ոչ ոք «թարգմանչի» կարիք չի ունենա, եթե խոսեն ապագայի լեզվով, այլ ոչ թե անցյալի, եթե մտածեն Արցախի խնդրի մասին, որը երեսուն տարի առաջ է ծագել, այլ ոչ թե սեփական դիրքերի ամրապնդման»,-գրում է Կազիմիրովը։

Մինսկի խմբի նախկին համանախագահը ցավով փաստում է, որ տեղացի առանձին լրագրողները փորձում են իրեն այս կամ այն ճամբարում ներառել, այլ կերպ ասած` Հայաստանի զուտ ներքին գործերին խառնել։

Այնուամենայնիվ, նա կարծում է, որ հակամարտության երեք կողմերիր առողջ ուժերի համախմբումը կարևոր է տարածաշրջանում խաղաղության ու կայունության համար։ Ընդ որում, Արցախում բավականին արագ հաղթահարեցին առաջացած ներքին խնդիրները։ «Ժամանակն է, որ ավագ եղբայրները սովորեն իրենց կրտսեր եղբայրներից», -ամփոփում է հեղինակը։

Նշենք, ավելի վաղ վարչապետ Նիկոլ Փաշինյանը նշել էր, որ պատրաստ է հանդիպել իրեն նախորդող Սերժ Սարգսյանի հետ միայն արցախյան հիմնախնդիրը քննարկելու նպատակով։ Իսկ վերջերս կայացել է Փաշինյանի հանդիպումը Հայաստանի առաջին նախագահ Լևոն Տեր-Պետրոսյանի հետ։ Ինչ վերաբերում է երկրորդ նախագահ Ռոբերտ Քոչարյանին, ապա հիմա նա կալանավորված է 2008 թվականի մարտի 1-ի իրադարձությունների ժամանակ սահմանադրական կարգը տապալելու մեղադրանքով։

Աղբյուր՝ armeniasputnik.am

Be the first to comment on "Ինչու՞ պետք է հանդիպեն Նիկոլ Փաշինյանն ու Սերժ Սարգսյանը և ի՞նչ պետք է քննարկեն"

Leave a comment

Your email address will not be published.


*


ԴԻՏԵԼ